નખરાળી ગઝલ !

લીલી પીળી લાલ પેનમાં કાળી કાળી ગઝલ
એક કુંડલા ગામ અને  કલકત્તાવાળી ગઝલ !

અરધું અંગ   અને તે  ડાબું પત્ની જેવું  મળ્યું
જ્યાં લગ કોઇ કોઇ દિન આવે છે સાળી ગઝલ !

કોઇ  હાથ  હથેળી   ઉપર થપ્પડ  મારે  નહીં
તમને સંભળાઇ તે છે એક હાથની તાળી ગઝલ !

હબસીના નહીં   જન્મેલા બાળકનું પહેલું  રુદન
હોઇ શકે છે કોઇ દિવસ એક શક્તિશાળી ગઝલ !

વિખેરાઇને શબ્દકોશમા છુપાઇ ગઇ છે ‘કંવલ’
પાને-પાને   શોધું છું  હું  એ  નખરાળી ગઝલ !
- ભરત વિંઝુડા